WelCom News
A newspaper for the Wellington and Palmerston North Catholic Dioceses

To tātou Hui Aranga 2014: Māori gathering for Easter

May 2014

Feature

Nā Rāwiri Tinirau i tito tēnei pūrongo rangatira.

Kua roa te wā e whakanuia ana te matenga me te aranga ake o te Kaiwhakaora, ko Hehu Karaiti, e ngā Katorika, e ngā Karaitiana, puta noa i te ao. I te tau 1946, i tū te Hui Aranga tuatahi ki te marae o Pukekaraka, ki Ōtaki, engari i taua wā, i karangatia te hui nei ko te Hui Tau Katorika. I mua tonu i te Hui Tau Katorika nei, i huihui ngā rōpū Māori Katorika i roto i ō rātou ake kāinga, ki te whakariterite i a rātou anō. Ko ngā rōpū i tae ake ki te hui tuatahi nei nō Taranaki (Waitara, Araukūku, Te Hāwera), nō te awa o Whanganui (arā nō Rānana, nō Kaiwhaikī), nō Te Matau a Māui (arā, nō Te Wairoa, nō Raupunga, nō Tāmakinui-a-Rua), me Ōtaki. Ko ēnei ngā hāpori Māori i noho tūturu ai ngā pirihi o te kāhui o Maria (arā te Society of Mary). Nā te aroha me te whanaungatanga i puawai i waenganui i te kāhui nei me ngā hāpori Māori, i toko ake te whakaaro kia whakatū i tētehi hui hei whakakōtahi i ngā hāpori Katorika Māori; i whānau mai ko te kaupapa o te Hui Aranga. Ahakoa kōtahi tonu te kaupapa o te Hui Aranga, he maha noa atu ōna pekanga e hāngai pū ana ki ngā hāpori Māori Katorika. E kīa ana he hui tapu, nā te tapu o tōna kaupapa; nā te Atua i hōmai tana tamaiti, a Hehu Karaiti, kia mate taurekareka atu, kia hiki, kia muru hoki i ngā hara o te hunga tangata. Mā reira ka whai oranga tātou, ā koia te take e kīa ai he hui tapu te Hui Aranga.

Hui katoa, kōtahi mano e rima rau ngā tāngata i tae ki tō tātou Hui Aranga i tēnei tau, i tū ki te Kāreti o Hato Pātariki ki Heretaunga, mai i te 17-21 o Paenga Whāwhā. Ko ngā karapu i tae mai i tēnei tau, ko Te Rōpū o Te Whitu (nō Hokianga ki Whangārei), ko Te Puna Tauranga Moana (Tauranga Moana), ko Waipatu (Heretaunga), ko Araukūku (Taranaki), ko Ruapehu, ko Te Wainui-a-Rua, ko Te Rōpū o Parikino, ko Hato Pētera Kaniera, ko Hato Wēneti (nō Whanganui nui tonu ēnei rōpū e rima). Ko ngā rōpū tangata whenua ko ngā karapu Katorika ki te tonga, arā, ko Ngā Karere (Te Whanganui-a-Tara), Tū Hono (Porirua) me Te Waiora (Te Papa-i-ōea).

I te Taite, i tū te pōwhiri ki ngā manuhiri me ngā karapu. I muri mai i te pōwhiri, ko te wā kai, ko te miha mō te hākari tapu o te Ariki, ā whai muri i tērā, ko ngā whakataetae whaikōrero, pātere anō hoki. I te Paraire Pai, ngā whakataetae kapa haka a ngā mokopuna, ā i te toru o ngā hāora i te ahiahi ko te karakia mō te matenga rawa o Hehu. I te pō o te Paraire, ko ngā whakataetae kapa haka a ngā taitamariki. Ko te Rā Horoi te rā mō ngā whakataetae tākaro, arā te whutupōro, te poitarawhiti, te pā whutupōro, te tēnehi me te tēnehi tēpu. I te pō o te Rā Horoi, ko te karakia mō te ahiwairua me te waitapu, whaimuri ko ngā whakataetae mō ngā koāea (arā ngā waiata tira) me ngā kaiwaiata takitahi. Ko te Rā Tapu te rā i ara ake te Kaiwhakaora, ā koia hoki te kaupapa o ngā karakia i taua rangi. I muri i te rangatū tapu me te hākari, ko ngā whakataetae patapatai, ā i te pō ko ngā whakataetae kapa haka a ngā mātua. Ko te Mane te rā poroporoaki ki ngā karapu; ka nui te mihi ki a Hato Pētera Kaniera i toa i roto i ngā mahi whakataetae i tēnei tau, ā ka nui te aroha ki te karapu o Waipatu e kawe ana i te mauri o te Hui Aranga hei te tau e tū mai nei.

Ehara tēnei huihuinga mō ngā tāngata Katorika noa iho – ka whai wāhi ai ngā tāngata katoa ki te Hui Aranga, ahakoa nā wai, ahakoa nō hea, ahakoa tō rātou ake whakapono. Kua tata tātou ki te whitu tekau tau e whakahaere ana tēnei kaupapa. Ko te wawata, ka haere ake, ā ka tū tonu tō tātou kaupapa hei ngā tau whitu tekau ā muri ake nei. Korōria! Hāreruia! Kua ara ake te Ariki!

Tēnei te mihi ki a Rāwiri Tinirau. Ko ia te Kāpene Karapu o te Waiora. Ko ia hoki te rangatira o te rōpū liturgy mō tēnei Hui Aranga. E ai ki ngā tangata i emi i te Hui Aranga ko tētehi mea tino rawe ko te whakaari o te Mamaenui o te Karaiti. Tēnei hoki te mihi ki a koutou e te karapu o Te Waiora.

Tēnei hoki te mihi ki ngā kaiwhakaahua, ko Jason Ake koutou ko David Nonu ko Nikki Phillips me ngā kaiwhakaahua katoa no te karapu o Ngā Karere.

Rāwiri Tinirau from Te Waiora club wrote this account of the 2014 Hui Aranga. Rāwiri is the Club Captain of Te Waiora club. He headed the Liturgy Team as part of Te Waiora’s hosting duties. The liturgy, especially the Friday Passion whakaari were highlights of the 2014 Hui Aranga.